Балаларды оқытқан да жақсы, бірақ құлшылық қыларлық қана, түркі танырлық қана таза оқыса болады. Оның үшін бұл жер дарулхарап, мұнда әуелі мал табу керек, онан соң араб, парсы керек. Қарны аш кісінің көңілінде ақыл, бойында ар, ғылымға құмарлық қайдан тұрсын? Ашап-ішімге малдың тапшылығы да ағайынның араздығына уә әртүрлі пәлеге, ұрлық, зорлық, қулық, сұмдық секілді нәрселерге үйірлендіруге себеп болатұғын нәрсе. Мал тапса, қарын тояды. Онан соң, білім түгіл өнер керек екен. Соны үйренейін не балама үйретейін деп ойына жақсы түседі. Орысша оқу керек, хикмет те, мал да, өнер де, ғылым да - бәрі орыста тұр. Зарарынан қашық болу, пайдасына ортақ болуға тілін, оқуын, ғылымын білмек керек. Оның себебі олар дүниенің тілін білді, мұндай болды. Сен оның тілін білсең, көкірек көзің ашылады. Әрбіреудің тілін, өнерін білген кісі оныменен бірдейлік дағуасына кіреді, аса арсыздана жалынбайды. Дінге де жақсы білгендік керек. Жорғалықпенен көңілін алсам екен деген надан әке-шешесін, ағайын-жұртын, дінін, адамшылығын жауырынынан бір қаққанға сатады. Тек майордың күлгені керек деп, к...і ашылса да, қам жемейді. Орыстың ғылымы, өнері - дүниенің кілті, оны білгенге дүние арзанырақ түседі. Ләкин осы күнде орыс ғылымын баласына үйреткен жандар соның қаруымен тағы қазақты аңдысам екен дейді. Жоқ, олай ниет керек емес. Малды қалай адал еңбек қылғанда табады екен, соны үйретейік, мұны көріп және үйренушілер көбейсе, ұлықсыған орыстардың жұртқа бірдей законы болмаса, законсыз қорлығына көнбес едік. Қазаққа күзетші болайын деп, біз де ел болып, жұрт білгенді біліп, халық қатарына қосылудың қамын жейік деп ниеттеніп үйрену керек. Қазір де орыстан оқыған балалардан артық жақсы кісі шыға алмай да тұр. Себебі: ата-анасы, ағайын-туғаны, бір жағынан, бұзып жатыр. Сүйтсе де, осы оқыған балалар - ана оқымаған қазақ балаларынан үздік, озық. Не қылса да сөзді ұқтырса болады оларға. Жақсы атаның балалары да көп оқыған жоқ, қайта, кедейдің балаларын орысқа қорлап берді. Олар осыдан артық қайда барсын? Және де кейбір қазақтар ағайынымен араздасқанда: «Сенің осы қорлығыңа көнгенше, баламды солдатқа беріп, басыма шаш, аузыма мұрт қойып кетпесем бе!» деуші еді. Осындай жаман сөзді, құдайдан қорықпай, пендеден ұялмай айтқан қазақтардың баласы оқығанменен не бола қойсын? Сонда да өзге қазақ балаларынан артық үйренгені немене, қай көп үйреніпті? Кірді, шықты, ілді, қайтты, түбегейлеп оқыған бала да жоқ. Әкесі ел ақшасымен оқығанға әрең оқытады, өз малын не қылып шығарсын? Турасын ойлағанда, балаңа қатын әперме, енші берме, барыңды салсаң да, балаңа орыстың ғылымын үйрет! Мына мен айтқан жол - мал аяр жол емес. Құдайдан қорық, пендеден ұял, балаң бала болсын десең - оқыт, мал аяма! Әйтпесе, бір ит қазақ болып қалған соң, саған рахат көрсете ме, өзі рахат көре ме, я жұртқа рахат көрсете ме?
5 пікір
Жамбыл
Кедейлік пен қаражаттың жетіспеушілігі көбінесе адамдарды ұрлық немесе зорлық-зомбылық сияқты адал емес шешімдер қабылдауға мәжбүр етеді. Алайда, адам мұндай уайымдардан босатылған кезде, ол дамып, қалыптасуы мүмкін. Осылайша, кедейлікпен күресу қоғамдағы бейбітшілік пен әл-ауқатты сақтаудың маңызды сәттерінің бірі болып табылады.
Аклима
Автор орыс тілі мен мәдениетін зерттеу орыс халқының ең жақсы қасиеттерін қабылдауға көмектесетінін атап өтті. Орыс тілі әлемге көз ашады және оны білу адамға басқа халықтармен және мәдениеттермен теңдік орнатуға көмектеседі. Алайда, автор мақұлдауды шақыру үшін басқалардың алдында жұмыс істейтін адамдарға да назар аударады. Бұл мінез-құлық пайдасыз ғана емес, сонымен қатар тұлғаның дамуына зиянды.
Шерхан
Басқа халықтардың тілі мен мәдениетін білу тек ресми болмауы керек екенін ескеру маңызды. Адам оларды шынымен тану және бағалау үшін өзін осы мәдениет пен халықтың бір бөлігі ретінде сезінуі керек. Бұл оған басқа мәдениеттерге ашық және төзімді болуға көмектеседі, бұл өз кезегінде әртүрлі елдер мен халықтар арасындағы қатынастардың жақсаруына әкелуі мүмкін.
Жолдас
Жалпы, мәтін қазіргі уақытта өте маңызды және өзекті. Ол адамдарды кедейлік пен надандықпен күресуге шақырады
Данара
Бұл мәтінде халықтың білімі мен мәдениетін дамытудың өте өзекті мәселесі, әсіресе ана тілін сақтау тұрғысынан. Автор болашақта өз халқына қызмет ете алатындай етіп балаларға ана тілін үйрету керек деп санайды. Дегенмен, қазіргі уақытта көптеген адамдар балаларды тәрбиелеуге емес, ақша табуға назар аударады. Бұдан шығатыны, біздің қоғам білім мен мәдениетті дамытуға көбірек көңіл бөлуі керек, осылайша біздің халық өзінің жеке басын сақтап, жетістікке жете алады.